Natalia Bakhareva (ulita_n) wrote,
Natalia Bakhareva
ulita_n

Category:

Тропари и кондаки еллинстии. Иулий 11 - 31 (24 ил - 13 сент.). Источник - Ωρολογιον το μεγα. Αθηνα.

11 (24)
Тропарь святыя великомученицы Евфимии всехвальныя. Глас 3.
Зело́ правосла́вныя обра́довала еси́/ и злосла́вныя посрами́ла еси́,/ Евфи́мие, Христо́ва доброде́во,/ Четве́ртаго Собо́ра догма́ты утверди́ла еси́,/ и́же отцы́ до́бре испове́даша./ Му́ченице сла́вная,/ Христа́ Бо́га моли/ дарова́ти нам ве́лию ми́лость.
Тропарь равноапостольныя Ольги. Глас 3.
Боже́ственныя ве́ры нача́ло свято́е/ в Росси́и показа́лася еси́,/ ко благода́ти Спа́сове прише́дши/ и к ней лю́дие твоя́ приве́дши,/ я́ко и́стинная цари́ца и богоприя́тная./ О́льго сла́вная,/ Христа́ Бо́га моли́/ дарова́ти нам ве́лию ми́лость.
12 (25).
Тропарь святых мучеников Прокла и Илария. Глас 1.
Во Христо́во всеору́жие свяще́нно обо́лкшеся,/ Ила́рие и Про́кле,/ па́че естества́ пострада́сте,/ и сла́вы небе́сныя прича́стницы показа́стеся,/ я́ко о́бщницы Христо́вы./ Сего́ ра́ди благода́тей дарова́ньми светово́дите зову́щих:/ Сла́ва Укре́пльшему вы,/ сла́ва Венча́вшему,// сла́ва Де́йствующему ва́ми всем исцеле́ния.
Кондак. Глас 2.
Я́ко сро́дницы и нра́вы единоду́шнии,/ и во всем единомы́сленни яви́стеся,/ Про́кле, му́чениче досточу́дный/ со Ила́рием богому́дрым./ Страсть бо Христо́ву изобрази́вше,/ благосла́вия от Него́ сподо́бистеся,// подаю́ще всем оставле́ние.
13 (26).
Тропарь ин архангела Гавриила. Глас 4.
Я́ко боже́ственный арха́нгел у́мных во́инств,/ тро́ическое осия́ние све́тло восприя́л еси́,/ Гаврии́ле архистрати́же./ Те́мже от вся́каго вре́да и вся́кия ну́жды/спаса́й неуя́звлены ве́рныя, чту́щия тя,/ и любо́вию восхваля́ющие// твоя́ чудеса́.
Кондак. Глас тойже. (Ср. седален службы 13 июля)
Безпло́тных служи́телей я́ко пе́рвенствуяй,/ пре́жде век повеле́нное, вои́стинну ве́лие,/ тебе́, Гаврии́ле, та́инство вве́рено есть,/ Рождество́ неизрече́нное Пресвяты́я Де́вы./ Ра́дуйся, возглаша́я Ей, Благода́тная,/ Те́мже  по до́лгу тя, ве́рнии,// в весе́лии при́сно ублажа́ем.
Тропарь преподобнаго Стефана Савваита. Глас 4.
Я́ко боже́ственное увенча́ние* доброде́телей стяжа́в,/ све́тло увенча́л еси́ Це́рковь Христо́ву де́лы и словесы́./ Ты бо я́ко иера́рх и богоглаго́льник му́дрый,/ боже́ственных пе́сен цевни́ца,/ о́тче Стефа́не яви́лся еси́./ Сего́ ра́ди светлостьми́ твои́ми// нас увенча́й.
Στεφανος – венец, венок.
Кондак. Глас 3.
По́стником единонра́вен быв, богому́дре,/иера́рх  преподо́бен от Бо́га предложи́лся еси́,/ всю Це́рковь просвеща́я/ свире́лию богодохнове́нного твоего́, о́тче, язы́ка./ Сего́ ра́ди тя почита́ем,// я́ко Бо́жия таи́нника, Стефа́не всему́дре.
[У нас - 18 мая (у греков – 13 июля, или первая неделя после).
Тропарь седми Соборов. Глас 1.
Седмочи́сленный сонм собо́ров почти́м./ И́миже благо́е преда́ние невре́дно стяжа́хом./ Я́ко столпы́ бо тыя седмь Це́ркви Христо́с утверди́,/ тех догма́ты, я́ко анки́ру незы́блему, храня́щи, воспева́ет всегда:/ Слава Возсиявшему вы,/ слава возвеличившему,// слава Утвержда́ющему ва́ми ве́ру правосла́вную.]
14 (27)
Тропарь святаго апостола Акилы. Глас 1.
Па́влов учени́к и спутеше́ственник яви́лся еси́,/ душе́ю сло́во благода́ти прия́в,/ Аки́ло апо́столе,/ Спа́сов служи́телю./ Те́мже  озари́л еси́ в нощи́ пре́лести су́щия,/ и подвиза́лся еси́ о сла́ве Госпо́дней,//Те́мже  восхваля́ем тя.
Тропарь святителя Иосифа архиепископа Солунскаго. Глас 4.
О́браз быв одушевле́нный богови́дных доброде́телей,/ о́браз чти́ти непоро́чный Живода́вца Христа́ воспропове́дал еси́./ Те́мже  испове́дания по́двиги просия́в,/ яви́лся еси́ Солу́ни, Ио́сифе, пастырена́чальник.// Сего́ ра́ди тя Влады́ка всех просла́ви.
Кондак. Глас 2.
Богоглаго́ливая цевни́ца уче́ний твои́х,/ Спа́сову хвалу́ возвели́чила есть,/ правосла́вия благоразу́мие/ и честны́х ико́н честь всем возвеща́ющи,// му́дре Ио́сифе, отце́в похвало́.
15 (28)
Тропарь святых мучеников Кирика и Иулитты. Глас 4.
Доброму́ченица Христо́ва Иули́тта/ со триле́тним а́гнцем ея́ Ки́риком/ пред суди́щем предста́ша све́тло,/ благодерзнове́нно возвести́вше христоиме́нное зва́ние,/ обои́ не устраши́вшеся преще́ния мучи́телева,/ и венцено́сни ны́не на небесе́х ра́дуются,// Христу́ предстоя́ще.
16 (29)
Тропарь священномученика Афиногена. Глас 3.
Пома́зание свято́е восприя́в,/ му́ченик боже́ственный Сло́ва яви́лся еси́./Афиноге́не, пострада́в крепча́йше,/и я́ко же́ртву Ему́ прине́сл еси́/ ученико́в твои́х двоедеся́тицу всечестну́ю./ С ни́миже моли́ся да́ти велича́ющим тя// прегреше́ний очище́ние и ве́лию ми́лость.
Кондак. Глас 2.
Свяще́нствовав непоро́чно Творцу́ твоему́,/ му́ченическое всепло́дие яви́лся еси́,/ со ученики́ твои́ми вку́пе поже́рся,/ я́коже па́стырь со а́гнцы, Афиноге́не.// С ни́ми и боже́ственныя сла́вы улучи́л еси́.
17 (30).
Тропарь святыя великомученицы Марины. Глас 5.
Уневе́стившися Сло́ву, Мари́но сла́вная,/земны́х о́браз вся́кий оста́вила еси́,/ и пострада́ла еси́ све́тло, я́ко доброде́ва./ Неви́димаго бо врага́ попра́ла еси́ тве́рдо,/я́вльшагося ти, страстоте́рпице./ И ны́не то́чиши ми́ру// исцеле́ний дарова́ния.
Ин тропарь. Глас тойже.
Вра́жия ловле́ния си́лою избе́гла еси́,/и к нему́ прибли́жившися, порази́ла еси́,/и от Бо́га изоби́льно благода́ть восприя́ла еси́/ отгоня́ти от ве́рных неду́ги губи́тельныя./ Сего́ ра́ди моли́ся ко Го́споду о нас,// Мари́но сла́вная.
18 (31).
Тропарь святаго мученика Емилиана. Глас 4.
Я́ко приноше́ние и всепло́дие боже́ственное,/ огне́м Влады́це принесе́н,/ одожде́ньми благода́тей твои́х весели́ши ны́не нас./ Огнь бо небе́сный в душе́ обнося́,/ я́ко ве́тра ве́яние прия́л еси́ сожже́ние, му́чениче./ Но не преста́й всегда́ огражда́я чту́щия тя,// Емилиа́не сла́вне.
Кондак. Глас 8.
Я́ко благоче́стия столпописа́ние богоизва́янное,/ нече́стия низложи́тель показа́лся еси́,/ чти́лища сокруши́в губи́тельная./ Но я́ко испо́лнь боже́ственныя лю́бве,/ я́ко зла́то во огни́ испыта́н обре́лся еси́.//Те́мже  зове́м: Ра́дуйся, му́чениче непобеди́мый.
19 (1 авг.)
Тропарь преподобныя Макрины. Глас 3.
Прему́дрости любо́вию ум окрили́вши,/ ми́ра благостра́стие му́дро оста́вила еси́,/ и жили́ще кра́сное любому́дрия яви́лася еси́./ Ты бо по́двига ра́ди и нра́вов соверше́нства/ неве́ста яви́лася еси́ Спа́сова, сла́вная./ О, моли́ся о вопию́щих:// Ра́дуйся,Макри́но богоно́сная.
Кондак. Глас 4.
Я́ко све́та пра́вды испо́лнена,/обра́з боже́ственных дел/ и доброде́телей     тайново́дица яви́лася еси́/ ве́рою вопию́щим ти:// Ра́дуйся, Макри́но, дев украше́ние.
Тропарь преподобнаго Дия Константинопольскаго. Глас 4.
Житие́, сообра́зное зва́нию, жи́тельствовавый,/ сла́вы Ду́ха дщи́ца яви́лася еси́ честна́я,/ о́тче наш преподо́бный,/ ты бо чудоде́йствы свяще́нными сия́я,/ сла́вен  преподо́бных тезоимени́то показа́лся еси́./ Сего́ ра́ди тя восхваля́ем,// Ди́е блаже́нне.
21 (3 авг.)
Тропарь преподобных отцев наших Симеона, Христа́ ради юродиваго и Иоанна, спостника его. Глас 4.
Я́ко соедине́ни боже́ственною любо́вию,/ единоду́шни нра́вы яви́стеся во всем,/ о Иоа́нне преподо́бне и боже́ственный Симео́не,/ ов у́бо житие́ свято́е в пусты́ни проходя́,/ ов же прему́дрыми по́двиги Велиа́ра посрами́в./ И ны́не, ку́пно боже́ственным воздая́нием наслажда́ющеся,//на нас призира́ете.
Кондак. Глас 2.
И́же во пло́ти я́вльшагося а́ки безпло́тен,/  и доброде́тельми преми́рно просия́вшего,/ Симео́на равноа́нгельнаго и богому́драго восхва́лим,/ с ним и Иоа́нна всепе́таго,/ ве́рою и любо́вию,// я́ко моля́щихся ко Го́споду непреста́нно о всех нас.
22 (4 авг.)
Кондак святыя равноапостольныя Марии Магдалины. Глас 4.
Пресу́щественный Бог,/ в мир пло́тию прише́дый,/ тебе́, мироно́сице, и́стинную учени́цу прия́т,/ все твое́ жела́ние к нему́ иму́щу./ Тем же и исцеле́ния мно́гая соверши́ла еси́,/ и предстоя́щи ны́не на небесе́х// о ми́ре мо́лишися всегда́.
Тропарь святыя девы мученицы Маркелы. Глас 4.
Де́ва непоро́чная/ и страстоте́рпица честна́я показа́лася еси́,/ о зако́не Христо́ве пострада́вши,/ Марке́ло всехва́льная./Те́мже  исцеле́ний то́чиши благода́ть/ всем приходя́щим к те́плому твоему́ предста́тельству,// моля́щися ко Го́споду о чту́щих тя.
Кондак. Глас тойже.
Де́вства благода́тьми украше́на,/ му́ченичества кровьми́ свяще́нно обагре́на./ Те́мже  досто́йно просла́вилася еси́,/ де́во му́ченице// Марке́ло всехва́льная.
23 иул. у греков
[у нас 22 септемвриа (5 окт.)
Тропарь священномученика Фоки. Глас 3.
Свет осиява́ющи исцеле́ний,/ми́ру показа́ся моще́й твои́х ра́ка боже́ственная./ Ея́же честно́е пренесе́ние пра́зднующе,/ Освяще́ние и́стинное прие́млем./ Фо́ко сла́вне,/ Христа́ Бо́га моли́// дарова́ти нам ве́лию ми́лость.
Кондак. 8.
Я́ко сокро́вище неоску́дное дарова́ний духо́вных/ свяще́нных моще́й твои́х ра́ку обстоя́ще, сла́вне,/ душе́вных неду́гов и вся́ческих страсте́й  исцеле́ния прие́млем,// восхваля́юще, Фо́ко, боже́ственная твоя́ исправле́ния.]
[У нас 3 авг.
Тропарь святаго пророка Иезекииля. Глас 3.
Боже́ственнаго ду́ха вдохнове́нием/ провозвести́л еси́, Бо́жий проро́че,/ гряду́щих та́инств сбытие́./ Спа́сово неизрече́нное истоща́ние/ и от ве́ка ме́ртвых воскресе́ние./ Иезекии́ле сла́вне,/ Христа́ Бо́га моли́// дарова́ти нам ве́лию ми́лость.
Кондак.  Глас 4.
Озаре́н боже́ственным осия́нием,/ проро́чества благода́ть прия́л еси́,/ предживопису́я гряду́щая в ми́ре обра́зно,/дверь непрохо́дную прови́дя Де́ву,/ от Нея́же Сло́во возсия́, я́ко па́стырь в ми́ре,/ Иезекии́ле, проро́че Бо́жий,// и от кля́твы нас свободи́.
24 (6 авг.)
Тропарь святыя великомученицы Христины. Глас 5.
Отцо́ву пре́лесть оста́вльши, сла́вная,/ благоче́стия прия́ла еси́ боже́ственное осия́ние,/ и уневе́стилася еси́ Христу́, я́ко доброде́ва./ Те́мже  подвизала́ся еси́ тве́рдо,/ и низложи́ла еси́ врага́, Христи́но великому́ченице./ И ны́не непреста́нно моли́// поми́ловатися душа́м на́шим.
26 (8 авг.)
Тропарь священномученика Ермолая и иже с ним мучеников Ермиппа и Ермократа. Глас 3.
Свяще́нствовавше и́стинно, святи́и,/ Пода́вшему нам лу́чшая,/ му́ченичества стезю́ сконча́ли есте́ ра́достно,/ свяще́нне Ермола́е, со Ерми́ппом Ермокра́те,/ тристо́лпное утвержде́ние Це́ркве бы́вше./ Сего́ ра́ди непреста́нно моли́теся// спасти́ся всем от вся́каго вре́да.
Кондак. Глас 3.
Свяще́нницы богому́дрии я́ко вои́стинну показа́вшеся,/ свяще́ние одушевле́нное Тро́ице принесо́стеся,/ то́ками крове́й обагре́ни,/ я́звами живоно́сными испещре́ни,/ Ермола́е богому́дре// со Ерми́ппом и Ермокра́том вку́пе.
Кондак преподобномученицы Параскевы. Глас 8.
Страстоте́рпице, ве́рнии, похва́льная Параске́ве, прииди́те, согла́сно воспои́м,/ облиста́ет бо в ми́ре чудесы́,/ отгоня́ющи пре́лести темнонеи́стовство,/ и подаю́щи ве́рным благода́ть неоску́дную, зову́щим:// Ра́дуйся, му́ченице многострада́льная.
27 (9 авг.)
Тропарь ин святому великомученику и целителю Пантелеимону. Глас 3.
Боже́ственных нра́вов твои́х худо́жеством/ подае́ши безме́здно в Ду́се врачева́ние/ душе́вное и теле́сное./ Те́мже  нас от вся́каго неду́га свободи́,/ Пантелеи́моне, ми́лости сокро́вище./ Му́чениче сла́вне,/ Христа́ Бо́га моли́// дарова́ти нам ве́лию ми́лость.
28 (10 авг.)
Тропарь святых апостолов и диаконов Прохора, Никанора, Тимона и Пармена. Глас 4.
Боже́ственнии спу́тницы апо́столов Христо́вых,/ от Бо́га избра́стеся/ служи́ти благоче́стно боже́ственному исполне́нию,/ Про́хоре богоглаго́ливе с Никано́ром вку́пе,/ Ти́моне богопропове́дниче/ и Парме́не боже́ственный,// моля́щеся ко Го́споду пода́ти нам оставле́ние.
Тропарь преподобныя Ирины Хрисовалантския [Каппадокийския, игумении обители Хисоваланта (золотой кошелек)]. Глас 3.
Сла́ву теку́щую презре́вши,/ неве́ста непоро́чная  яви́лася еси́ Госпо́дня./ по́стничеством просия́вши, преподо́бная./Я́ко у́бо, улучи́вши, Ири́но, любо́вь твою́,/ во единомы́слии нас соблюди́, досточу́дная,/ Христа́ Бо́га моля́щи// дарова́ти нам ве́лию ми́лость.
Кондак. Глас 3.
Ми́ра благосла́вие оста́вльши, преподо́бная,/ Христу́ уневе́стилася еси́, Царю́ нетле́нному,/ добро́тами де́вства просвеще́на,/ по́двиги воздержа́ния преукраше́на./ Сего́ ра́ди тя, Ири́но,// жени́х твой све́тло просла́ви.
Тропарь преподобнаго Павла Ксиропотамскаго. Глас 5.
Ца́рское досто́инство премени́в/ богоистка́нным хито́ном преподо́бнаго жития́,/ я́ко у́тренняя звезда́, на Афо́не просия́л еси́,/ и наставля́еши просвеще́нно к невече́рнему блаже́нству./ Па́вле, отце́в ве́рше,/ взира́ющих с любо́вию// к осия́нию сла́вы твоея́.
Кондак. Глас 4.
Я́ко ца́рское прозябе́ние,/ Па́вле богому́дре,/ насле́дник досто́ин/ и сын яви́лся еси́ сла́вен Небе́снаго Всецаря́,// равноа́нгельнаго ра́ди жития́, о́тче преподо́бне.
29 (11 авг.)
Тропарь святаго мученика Каллиника. Глас 3.
Зва́ние, спу́тствующее житию́ имея́,/ побе́ду лу́чшую во страда́ниих подъя́л еси́,/ сообра́зен быв тому́, и́мже прозва́лся еси́,/ ты бо по́двиг твой до́бре сконча́в,/ я́ко победи́тель просла́вился еси́, Каллини́че./ Му́чениче сла́вне,/ Христа́ Бо́га моли́// дарова́ти нам ве́лию ми́лость.
30 (12 авг.)
Тропарь святых апостолов от семидесяти Силы, Силуана, Крискента, Епенета, Андроника. Глас 4.
Боже́ственнии апо́столи,/ я́ко небеса́ у́мная,/ сла́ву облиста́юще Истощи́вшаго себе́ на земли́,/ согла́сно да воспою́тся,/ Криске́нт и Силуа́н, и боже́ственный Си́ла/ со Андрони́ком вку́пе Епене́т богому́дрый.// Христа́ бо мо́лят спасти́ся всем.
31 (13 авг.)
Тропарь ин предпразднства Происхождения Честных Древ Животворящаго Креста Господня.
Глас 1.
Крест Честны́й, спаси́тельное ору́жие,/ прии́мем, ве́рнии, чи́стым помышле́нием./ Произы́ти бо гряде́т, боже́ственную благода́ть да́руяй,/ и исцеля́яй неду́ги душе́вныя вку́пе и теле́сныя/ де́йствием неизрече́нным// Христа́ Бо́га на́шего.
Кондак. Глас 2.
Я́ко боже́ственный све́точ, происхо́дит конце́м/ Крест Христо́в, и́мже жизнь дарова́ся./ Прии́дем у́бо челове́цы,/ и изба́влени бу́дем того́ благода́тию./ Той бо на нем распя́т быв,// всем подае́т очище́ние и живо́т.
Кондак святому правденому Евдокиму. Глас 3.
Днесь честна́я твоя́ па́мять нас собра́/ к боже́ственней ра́це свяще́нных моще́й твои́х./ Всем у́бо приходя́щим и покланя́ющимся/ всяк бесо́вский вред отгоня́ется,// и вся́ческих неду́гов свобожда́ются вско́ре.
Tags: тропари кондаки богослужебный тексты гим
Subscribe

  • Post a new comment

    Error

    Anonymous comments are disabled in this journal

    default userpic

    Your IP address will be recorded 

  • 12 comments