Natalia Bakhareva (ulita_n) wrote,
Natalia Bakhareva
ulita_n

Category:

Тропари и кондаки. Септемврий.

Тропари и кондаки. Перевод с греческого. Источник: Великий часослов (Ωρολογιον το μεγα). Афины. 2003 г.

1 (14) СЕПТЕМВРИА
Тропарь прп. Мелетия Новаго, глас 4
Во пло́ти а́нгел/ и уго́дниче Христо́в,/ я́ко сла́вный челове́к и по́стников добро́та,/ Меле́тие преподо́бне,/ да́ры богодарова́нныя стяжа́л еси́,/ ду́хи лука́выя изгоня́ти и неду́жныя исцеля́ти .// Сего́ ра́ди честна́я твоя́ ра́ка то́чит исцеле́ния.

2 (15) СЕПТЕМВРИА
Тропарь св. мч. Маманта, глас 4
Я́ко боже́ственное прозябе́ние богови́дных страда́льцев, по́двиги страда́льчества му́жествуеши свяще́нно кре́постию ве́ры. По́двиги бо па́че естества́ и чудесы́ мно́гими, Ма́манте великому́чениче, Спа́са сла́виши. О, моли́ся, мо́лимся, о душа́х на́ших.

Тропарь прп. Иоанна Постника, глас 4.
Пома́зан быв боже́ственным ду́хом,/ Це́ркве па́стырю,/ Бо́гу священноде́йствовал еси́ а́нгельски на земли́,/ Иоа́нне о́тче наш./ Ты бо посто́м себе́ очи́стивый,/ очище́ние прегреше́ний сло́вом свои́м подае́ши/ любо́вию к тебе́, священнонача́льниче, притека́ющим.

3 (16) СЕПТЕМВРИА
Тропарь сщмч. Анфима, глас 4.
Я́ко фи́никс процве́л еси́ в Це́ркви Христо́ве/ плода́ми слове́с твои́х,/ благочести́вых ду́ши пита́я благода́тию./ Те́мже и пострада́в, о́тче Анфи́ме, ра́дуяся,/ яви́лся еси́ священному́ченик благосла́вен Спа́сов./ О, моли́ся, мо́лимся,// о душа́х на́ших.

Тропарь прп. Феоктиста, глас 4.
Бо́гу от ю́ности возложе́н быв иере́й,/ тва́рных пристра́стие омерзи́л еси́ тве́рдо, Феокти́сте преподо́бне./ Отону́ду безмо́лвия сия́я нра́вы,/ яви́лся еси́ мона́шествующих изве́стный путево́ждь.// И ны́не приходя́щих к тебе́, о́тче, упра́ви .

4 (17) СЕПТЕМВРИА
Тропарь священномученика Вавилы, глас 4.
Священнонача́лия све́том сия́яй,/ пра́вды вертогра́дарь яви́лся (показ.) еси́,/ посека́я те́рние льсти вои́стинну./ Те́мже крове́й твои́х ка́плями обагри́вся, /Христу́ предста́л еси́, вопия́, Вави́ло:/ Се аз и де́ти, Иису́се.// Те́мже приими́ нас, я́ко благоволи́л еси́.


6 (19) СЕПТЕМВРИА
Тропарь св. Михаила Архистратига, глас 5.(Чудо в Хонех)
Я́ко облак яви́лся еси́ осеня́яй, Михаи́ле Чинонача́льниче,/ твоему́ свято́му хра́му,/ источа́я оби́льно во́ду безсме́ртия./ Те́мже я́ко други́й ковче́г сохрани́л еси́ его́/ и струй речны́х тече́ние устреми́л еси́ дале́че,// на ра́дость душа́м на́шим.
Кондак, глас 2.
И́же Тро́ице предстоя́й всесве́тел/ со все́ми небе́сными чи́нми,/ и боже́ственную песнь с ни́ми воспева́яй, Михаи́ле,/ и зе́млю ма́нием Бо́жиим проходя́й,/ и чудесы́ ве́лиими удивля́яй,// не преста́й моля́ся о всех нас.

10 (23) СЕПТЕМВРИА

Тропарь сщмцц. Минодоры, Митродоры и Нимфодоры, глас 1.
Тричи́сленное и Богоплете́нное собра́ние де́вственных сестр/ увенча́им боже́ственными пе́сньми./ Му́жески бо врага́ победи́ша./ Те́мже мо́лятся о нас, вопию́щих приле́жно:/ ра́дуйся, честна́я Минодо́ро со Митродо́рою боже́ственною// и Нимфодо́рою богому́дрою.

11 (24) СЕПТЕМВРИА
Тропарь преподобныя Феодоры Александрийския, глас 4.

Дар Боже́ственный, освяще́нный/ Бо́гу принесла́ еси́, житие́ твое́,/ Феодо́ро преподо́бная всехва́льная./ Покая́ния бо огнь показа́вши,/ посреде́ муже́й любому́дренно просия́ла еси́./ Те́мже моли́ся непреста́нно Просла́вльшему тя// дарова́ти нам ве́лию ми́лость.

12/ (25) СЕПТЕМВРИА

Тропарь сщмч. Автоному. Глас 1.

От за́пад возше́д, я́ко звезда́ небосве́тлая/ и к восто́ку возсия́в луча́ми нра́вов твои́х,/ Со́лнце сла́вы, Иису́са, просла́вил еси́/ страда́льчеством твои́м тве́рдым./ Сего́ ра́ди просла́вился еси́ богоде́йственно,/ Автоно́ме о́тче наш./ Сла́ва да́вщему ти кре́пость,/ сла́ва венча́вшему тя,// сла́ва де́йствующему тобо́ю всем исцеле́ния.

13 (26) СЕПТЕМВРИА
Тропарь сщмч. Корнилия (сотника), глас 4.
Пра́вды дея́ньми укра́шен,/ просвеще́ние благоче́стия прия́л еси́/ и апо́столом стру́дник яви́лся еси́ вои́стинну./ Тем бо приобщи́вся боже́ственными труды́,/ Христо́во воплоще́ние провозвести́л еси́ всем./ С ни́ми же моли́ спасти́ся нам, чту́щим тя,// всеблаже́нне Корни́лие.


15  (28) СЕПТЕМВРИА
Тропарь мученика Никиты, глас 3.
Побе́ду одержа́л еси́ над ле́стию –побе́ды прия́л еси́ награ́ду нетле́нную досто́йно,/ Ники́то побе́де тезоимени́те. Ты бо, победи́в враго́в ополче́ние,/ огне́м по́двиг сконча́л еси́./ Му́чениче сла́вне, /Христа́ Бо́га моли́// дарова́ти нам ве́лию ми́лость.


17 (30) СЕПТЕМВРИА

Тропарь святых мучениц Веры, Надежды, Любве и матере их Софии, глас 5.
Я́ко ма́слина благопло́дная/ произрасла́ еси́ во дво́рех Госпо́дних,/ Софи́е му́ченице честна́я,/ и принесла́ еси́ Христу́ плод сладча́йший,/ о́трасли от ложе́сн твои́х,/ по́двиги благоприя́тными,/ Любо́вь и Наде́жду с Ве́рою богому́дрою.// С ни́миже моли́ о всех нас.

18 СЕПТЕМВРИА  (1 ОКТ.)
Тропарь прп. Евмения Гортинскаго чудотворца, глас 4.
Ско́раго помо́щника и защи́тителя благосе́рдаго/ стяжа́хом тя, преподо́бне,/ я́ко Христу́ подража́теля,/ Евме́ние сла́вне./ Ты бо испуща́яй состра́стия струи́,/ то́чиши Це́ркви исцеле́ний мо́ре./ Оба́че и чту́щим тя покро́вом бу́ди.

Тропарь св. мц. Ариадны, глас 4.
Христо́вою окормля́ема дла́нию, не порабо́тила еси́ ду́шу Ариа́дно, но свобо́дным изволе́нием му́жествовала еси́, все умышле́ние вра́жие низложи́вши, вене́ц радостоплете́нный от Бо́га прия́ла еси́. Его́же моли́, му́ченице, приле́жно, поми́ловати ублажа́ющих тя.

20 СЕПТЕМВРИА  (3 ОКТ.)
Тропарь вмч. Евстафия (Плакиды), Феописты, супруги его и чад – Агапии и Феописта. Глас 1.
Поя́т быв с небесе́ ко благоче́стию, сла́вне, / си́лою, я́вльшеюся тебе́ я́ко еле́нь, Евста́фие,/ разли́чная искуше́ния претерпе́л еси́/ и просия́л еси́ во страда́льчестве свяще́ннем/ со свято́ю супру́жницею и со ча́ды,/ ра́дуя вопию́щих ти:/ сла́ва Просла́вльшему тя,/ сла́ва Венча́вшему тя,// сла́ва Показа́вшему тя во всех друга́го И́ова всеблаже́ннаго.

21 СЕПТЕМВРИА  (4 ОКТ.)
Тропарь ап. Кодрата, глас 1.
Прему́дрости луча́ми просвети́в житие́ твое́,/ привле́кл еси́ Ду́ха, блаже́нне, огнедохнове́нную благода́ть/ и возсия́л еси́ уче́ние жи́зни, Кодра́те, апо́столе Христо́в: / сего́ ра́ди я́ко свети́льника тя непреле́стнаго почита́юще, вопие́м:/ сла́ва просла́вльшему тя Христу́,/ сла́ва венча́вшему тя,/ сла́ва де́йствующему тобо́ю всем исцеле́ния.

22 СЕПТЕМВРИА  (5 ОКТ.)
Тропарь сщмч. Фоке, глас 4.
От младе́нства ду́ха явле́йся прия́телище све́тлое,/ чудесы́ обогати́ся от Него́ дарова́нием, Фо́ко свяще́ннейше:/ те́мже Спа́су священноде́йствовавый преподо́бно,/ пил еси́ во страда́льчестве ча́шу Его́:// о, моли́ся, мо́лимся, о душа́х на́ших.

24 СЕПТЕМВРИА  (7 ОКТ.)
Тропарь Прсв. Богородицы Миртидиотиссы, глас 4.
Я́ко исто́чник неистощи́мый благ Твои́х/ о́браз твой пречестны́й / Кифири́том , Чи́стая, дарова́ся, вопию́щим:/ ра́дуйся, предста́тельство всех моля́щих Ти ся,/ ра́дуйся, спасе́ние любо́вию чту́щих тя,// ра́дуйся, рассла́бленному исцеле́ние дарова́вшая.

Кондак, глас 8.
К Богоро́дице, ве́рнии, ны́не притеце́м,/ я́ко подае́т оби́льно исцеле́ния, воспева́юще любо́вию пе́сенная:/ но я́ко воздви́гла еси́ рассла́бленнаго, Богоневе́сто,/ от вся́каго нас изба́ви обстоя́ния, зову́щих ти:// ра́дуйся, сла́во всеми́рная.

Тропарь св. р.-ап. Феклы, глас 4.
Па́влова сопу́тнице,/ я́ко душе́ю чи́стая/ и первострада́лица яви́лася еси́ в жена́х благосла́вно,/ Христа́ возлюби́вши:/ ты бо ко благоче́стию любо́вию окриля́ема,/ пострада́ла еси́ па́че естества́, Фе́кло равноапо́стольне:// сего́ ра́ди тя Всеми́лостивый неве́сту прия́т.

25 СЕПТЕМВРИА  ( 8 ОКТ.)
Тропарь прп. Евфросинии, глас 5.
Я́ко де́ва му́драя и непоро́чная,/ приблизи́лася еси́ преподо́бно Жизнода́вццу Христу́/ и привре́менная бога́тства прему́дро оста́вила еси́:/ те́мже посреде́ муже́й, я́ко непоро́чная а́гница,/ просия́ла еси́, Евфроси́ние,// и стре́лы Велиа́ра/ жи́тельством твои́м притупи́ла еси́.

27 СЕПТЕМВРИА  ( 10 ОКТ.)
Тропарь св. мч. Каллистрата и иже с ним четыредесяти девяти , глас 3.
Боже́ственным Ду́хом огражда́ем,/ му́чениче Каллистра́те,/ све́тло до́бльствовал еси́,/ низлага́я лю́таго/ му́дростию по́двигов твои́х:/ сего́ ра́ди и прине́сл еси́ Христу́, я́ко кади́ло,/ сонм страда́льцев, уве́ренных тобо́ю,// с ни́миже моли́ о нас, сла́вящих тя в пе́снех.


28 СЕПТЕМВРИА  (11 ОКТ.)
Тропарь прп. Харитона исповедника, глас 4.
Заря́ми благода́ти Ду́ха озаре́н,/ свети́льник яви́лся еси́ жи́зни доброде́тельныя/ Харито́не блаже́нне:/ ты бо и́стины испове́данием облиста́в,/ просия́л еси́ в пусты́ни труды́ воздержа́ния// сего́ ра́ди хва́лящих тя, о́тче, помина́й.

29 СЕПТЕМВРИА  (12 ОКТ.)
Тропарь прп. Кириака отшельника, глас 4.
Христу́ после́довал еси́,/ оста́вив я́же на земли́,/ и в житии́ равноа́нгельном и́стинствовал еси́ я́ве,/ я́ко безпло́тен, преподо́бне,/ ты бо в пусты́нех, Бо́жией любо́вию плене́н быв ,/ о́стрым ноже́м дре́внюю го́речь отсе́кл еси́:/ сего́ ра́ди, Кириа́че богоно́сне, досто́йно просла́вился еси́.

30 СЕПТЕМВРИА   (13 ОКТ.)
Тропарь сщмч. Григория, глас 3.
Боже́ственныя ве́ры земледе́ланием/ возде́лал еси́ челове́ков сердца́, / посе́явый Сло́ва позна́ние/ и я́звами му́ченичества освяще́н,/ иера́рше Григо́рие, яви́лся еси́:/ о́тче преподо́бне,/ Христа́ Бо́га моли́// дарова́ти нам ве́лию ми́лость.
Tags: тропари богослужебные тексты гимнография
Subscribe

  • Post a new comment

    Error

    Anonymous comments are disabled in this journal

    default userpic

    Your IP address will be recorded 

  • 2 comments