Natalia Bakhareva (ulita_n) wrote,
Natalia Bakhareva
ulita_n

Category:

Тропари и кондаки еллинстии. Иуний 11 - 20 (24 - 2 иулиа). Источник - Ωρολογιον το μεγα. Αθηνα.

11 (24)
Тропарь святых апостолов Варфоломея и Варнавы. Глас 3.
Боже́ственнии орга́ны Паракли́та,/ яви́телие Бо́га Сло́ва/ яви́стеся богови́дцы апо́столи,/ Варфоломе́е, двана́десте ссе́льник,/ и Варна́во, я́ко утеше́ния сы́н./ Но моли́те Христа́ Бо́га, всехва́льнии,// дарова́ти нам ве́лию ми́лость.
Кондак. Глас 4.
Я́ко Христо́вы апо́столи/ и служи́тели благоче́стия догма́том,/ всю зе́млю просвеща́ете,/ Варфоломе́е богоприя́тне со Варна́вою,// сего́ ра́ди вас воспева́ем.
Кондак святаго Варфоломея. Глас 4.
(Вар. существующего)
Яви́лся еси́ вели́кое со́лнце Церкве/ уче́ний сия́ньми и чуде́с стра́шных, световодя́ почита́ющия тя,// Варфоломе́е, Госпо́день апо́столе.
12 (25)
Тропарь преподобных Онуфрия Египетскаго и Петра, иже на Афоне. Глас 1.
А́нгельское жи́тельство во пло́ти подража́юще,/ яви́стеся пусты́ннии гра́ждане и дарова́ний сокро́вища,/ Ону́фрие, Еги́петская добро́то,/ и Пе́тре, и́же на Афо́не свети́льниче./ Сего́ ра́ди по́двиги ва́ши при́сно почита́ем, воспева́юще:/ Сла́ва Укре́пльшему вы,/ сла́ва Уди́вльшему,/сла́ва Де́йствующему ва́ми всем исцеле́ния.
Кондак. Глас 8.
И́же пусты́нныя гра́жданы небоше́ственныя/ и даро́в па́че естества́ вмести́лища,/ Ону́фрия со Петро́м воспои́м./ Ов у́бо яви́ся во Еги́пте фи́никс благопло́дный,/ ов же просия́ на Афо́не, я́ко равноа́нгелен,/ сим глаго́люще: Богоно́снии, ра́дуйтеся.
Кондак преподобнаго Онуфрия. Глас 2.
Звезда́ све́тлая мона́хом показа́лся еси́,/ я́ко в нощи́ сия́ние, озаря́еши в конце́х./ Та́ко, о́тче, просия́л еси́ по́двигом, я́коже со́лнце./ Сего́ ра́ди, Ону́фрие, не преста́й моля́ся о всех нас.
Кондак преподобнаго Петра. Глас 8.
Свет у́мный и небе́сный, Пе́тре, прие́м в се́рдцы свое́м,/невмести́мыя Тро́ицы прия́телище яви́лся еси́ светле́йшее,// и благода́ть чуде́с восприя́л еси́, зовы́й: Аллилу́йа.
13 (26)
Тропарь святыя мученицы Акилины. Глас 4.
Де́ва непоро́чная и страстоте́рпица честна́я,/ показа́лася еси́ конце́м,/ любо́вию Христо́вою, Акили́но, богоневе́сто./ Ты бо я́ко ши́пок у́мный, процве́тши,/ вдохну́ла* еси́ в страда́льчестве чи́стоты благода́ть,//моля́щися ко Го́споду// спасти́ся всем нам.
*Вдохнула. Вар.: источила (поскольку слово «вдохнула» воспринимается нами как «вдохнула в себя», тогда как смысл скорее «источила».)
Кондак. Глас 3.
Ка́плями крове́й твои́х освяще́нну, де́во,/ и му́ченическими венцы́ тя, Акили́но, увенча́нну/даде́ и́же в ну́ждах притека́ющим с ве́рою/ неду́гов исцеле́ние и спасе́ние,// жени́х Твой Христо́с, источа́яй живо́т ве́чный.
14 (27)
Тропарь святаго пророка Елиссея ин. Глас 4.
Я́ко учи́теля и́стиннаго Спа́сова/ и и́же в зако́не наста́вника и свети́льника/ дале́че пока́за тя рождество́ твое́, му́дре./ Ты бо Фесви́тянина насле́довав благода́ть,/ чудесы́ просия́л еси́ и си́лами мно́гими./ И ны́не непреста́нно сохраня́й нас,// о Елиссе́е, проро́че боже́ственный.
Тропарь святителя Мефодия Константинопольскаго. Глас 5.
Благоче́стия худо́жество предложи́в,/ еретико́в разреша́еши умышле́ния кре́пко,/ правосла́вных основа́ние, о́тче Мефо́дие./ О́браз бо Христо́в почита́ти столпописа́л еси́,/ я́ко боже́ственный священнояви́тель./ И ны́не невеще́ственно сла́виши// и мо́лишися о душа́х на́ших.

Тропарь преподобнаго Нифонта Афонскаго. Глас 1.
Ипи́ра* се́мя, Афо́на порожде́ние и иере́ев сла́ву,/ богоно́снаго Ни́фонта пе́сньми почти́м свяще́нными./ Преподо́бных бо доброде́телей по́двигом/ небе́сных дарова́ний сподо́бивыйся,/ просвеща́ет зову́щия/ Сла́ва Да́вшему ти кре́пость,/ сла́ва Венча́вшему тя,/ сла́ва исполня́ющему тобо́ю всем поле́зная.
* Ηπειρου (регион в Греции, поделенный между Грецией и Албанией). В византийском (рейхлиновском поизношении должен был бы читаться как «Ипир», в настоящее время транскрибируется как «Эпир».)
Кондак. Глас 4.
На Афо́не просия́л еси́, я́ко денни́ца,/ мона́хов собра́ние твои́ми доброде́тельми просвеща́я,/ преподо́бный Ни́фонте о́тче наш./ Сего́ ра́ди// венце́м сла́вы украси́лся еси́.
15 (28)
Тропарь пророка Амоса. Глас 1.
Проро́ка тя ве́рнаго и я́же в вы́шних зри́теля/ яви́* тя, А́мосе, от па́ствы Сло́во,/ жития́ твоего́ показа́в благоприя́тно благосты́ню./ Те́мже нече́ствующих му́жески обличи́л еси́,/ и смерть му́ченически прия́в,// живо́т боже́ственный улучи́л еси́.
*Яви. Вар: избра.
Кондак. Глас 2.
Богодарова́нное явля́я де́йство,/ проро́ческим досто́инством просия́л еси́,/ и всем гряду́щая прорица́яй,/ челове́ком исправле́ние рекл еси́,// А́мосе, я́ко проро́к богоприя́тный.
16 (29)
Тропарь святителя Тихона, епископа Амафунта Кипрскаго. Глас 3.
Боже́ственное свяще́нство улучи́л еси́,/ ма́нием лу́чшим избра́н,/ я́ко служи́тель Тро́ицы досто́ин,/ты бо дел сия́я благода́тьми ,/ Це́рковь утверди́л еси́ чудесы́./ Ти́хоне преподо́бне,/ Христа́ Бо́га моли́// дарова́ти нам ве́лию ми́лость.
17 (30)
Тропарь святых мучеников Исавра и иже с ним и святых мучеников Мануила, Савела и Исмаила. Глас 3.
Я́ко девяточи́сленное Сло́ва сопряже́ние/ враго́в ополче́ние обрати́ша/ Иса́вр, Фе́ликс, с ни́ми Ерме́й и Перегри́н,/ вку́пе Инноке́нтий, Ману́ил и Васи́лий,/ Исмаи́л сла́вный и Саве́л блаже́нный./ Сего́ ра́ди побе́дные по́чести обрето́ша,// я́ко му́ченицы Госпо́дни.
Кондак святых мучеников Мануила, Савела и Исмаила.
Глас 2.
Ве́рою Христо́вою уязви́вшеся, всеблаже́ннии,/ и Сего́ ча́шу ве́рно пи́вше,/ пе́рсская чти́лища и де́рзость на зе́млю низложи́сте,/ Тро́ицы равночи́сленнии,// моли́твы творя́ще о всех нас.
18 (1 иулиа)
Тропарь святаго мученика Леонтия. Глас 3.
Си́лою боже́ственною препоя́сан,/ возмога́л еси́ в по́двизех, страстоте́рпче Спа́сов Лео́нтие./ Ты бо я́ко лев на страда́ние устреми́лся еси́,/ и враго́в кре́пость низложи́л еси́./ Му́чениче сла́вне,/ Христа́ Бо́га моли́/ дарова́ти нам ве́лию ми́лость.
Кондак. Глас 3.
Мучи́телей низложи́л еси́ лука́выя помышле́ния,/ и е́ллинов обличи́л еси́ нечести́вое чти́лище,/ возсия́л еси́ богоразу́мие всем челове́ком,/ догма́ты благоче́стия,/ богому́дре му́чениче.// Сего́ ра́ди твою́ па́мять почита́ем любо́вию, му́дре Лео́нтие.
19 (2 иулиа)
Кондак апостола Иуды. Глас 1.
От ко́рня благосла́внаго богодарова́нная розго́,/ прозя́бл еси́ нам, Госпо́день самови́дче, апо́столе, бра́те Госпо́день,/ Христо́в пропове́дниче всему́дре,/ весь мир пита́я плода́ми слове́с твои́х,/ ве́ре правосла́вней Госпо́дней науча́я,// я́ко таи́нник благода́ти.
Тропарь преподобнаго Паисия Великаго. Глас 4.
Во пло́ти а́нгел,/ мона́шествующих вене́ц,/ безпло́тный челове́к, небе́сный жи́тель,/ боже́ственный Паи́сий, / ра́дуется, па́мять свою́ с на́ми пра́зднуя,/ подае́т тружда́ющимся его́ ра́ди боже́ственную благода́ть.// Сего́ ра́ди с усе́рдием мно́гим того́ прославля́ем.
Кондак. Глас 8.
Я́ко пусты́ни градоде́ржца и украси́теля,/ и преподо́бных начерта́ние и о́трасль,/ ублажа́ем тя вси, Бо́жия служи́теля./ Ты бо яви́лся еси́ весь изде́тска богоно́сен/ и прили́чно зва́нию своему́ жи́тельствовал еси́./ Сего́ ра́ди вопие́м:// Ра́дуйся, о́тче Паи́сие.
20 (3 иулиа)
Тропарь священномученика Мефодия, епископа Патарскаго. Глас 3.
Боже́ственное худо́жество благоче́стия/ Це́ркви сокро́виществовал еси́,/ я́ко иера́рх и му́ченик, Мефо́дие./ Ты бо му́дрости бога́тство собра́в,/ страда́льчески свой тала́нт возрасти́л еси́./ О́тче преподо́бне,/ Христа́ Бо́га моли́// дарова́ти нам ве́лию ми́лость.
Кондак. Глас 4.
Я́ко све́тлость огня́ боже́ственный ра́зум стяжа́в,/ во страда́льчестве яви́лся еси́ тайноводи́тель я́же па́че ума́,/ просвеща́я пою́щия:/ Ра́дуйся,// яви́телю Сло́ва, Мефо́дие.


Tags: гимнография богослужебные тексты тропари
Subscribe

  • Post a new comment

    Error

    Anonymous comments are disabled in this journal

    default userpic

    Your IP address will be recorded 

  • 6 comments